पाँचथर– पाँचथरको मिक्लाजुङ गाउँपालिकामा हावाबाट विद्युत् उत्पादन गरिएको छ । 

स्थानीय सप्तमी बजारमा सयभन्दा बढी घर–परिवारलाई सुविधा हुनेगरी बिजुली उत्पादन गरिएको हो ।

स्थानीय तहकै सक्रियतामा सञ्चालित परियोजनाले दूरदराजका बासिन्दाको जीवनमा सकारात्मक प्रभाव पार्ने अपेक्षा गरिएको छ । स्थानीय स्रोत र प्रविधिको उपयोग गर्दै वैकल्पिक ऊर्जालाई प्रवद्र्धन गर्न यो परियोजना एउटा उदाहरणीय प्रयासको रूपमा हेरिएको छ ।

गाउँपालिकाका जनप्रतिनिधिका अनुसार बजार क्षेत्रका पसल, घर र साना व्यवसायलाई उज्यालो प्रदान गरिएको छ । हावाबाट उत्पादित बिजुलीको लागत कम हुने तथा वातावरणमैत्री प्रविधिको प्रवद्र्धन हुने भएकाले यसलाई भविष्यमा थप विस्तार गर्ने योजना बनाइएको छ ।

यसअघि बिजुली अभावका कारण राति नागरिकलाई असुविधा थियो । विद्युतीय उपकरण प्रयोग गर्न कठिनाइ हुने अवस्था थियो । अब भने निरन्तर विद्युत् आपूर्तिसँगै व्यवसाय तथा अन्य दैनिक कार्य सहज बनेका छन् ।

ऊर्जा विज्ञका अनुसार पाँचथरको पहाडी भेगमा पर्याप्त हावाको स्रोत रहेकाले यस्ता परियोजनाले दीर्घकालीन रूपमा ऊर्जा अभाव न्यूनीकरण गर्न महत्वपूर्ण योगदान गर्नसक्छन् ।